Lepenci dështon në shtëpi, vetëm barazim me Dukagjinin

 

Shkëlqim Ajdini

 

Lojtarët e Lepencit kanë bërë një dështim të madh para publikut të zjarrrtë kaçanikas duke mos arritur më shumë se një barazim me Dukagjinin. Edhe pse para ndeshjes në letër Lepenci shihej si superfavorit, rezultati në fund tregoi se nuk ishte parashikim i drejtë ky.

Si gjithmonë me një organizim perfekt të Fikshave, e diela në Kaçanik ishte si festë dhe vetëm pritej fitorja e Lepencit për ta konfirmuar këtë festë, mirëpo gjithçka shkoi huq kur gjyqtari kryesor dha shenjë për përfundimin e ndeshjes dhe festa u shndërrua në zhgënjim. Edhe pse Lepenci nuk humbi, mund të thuhet se barazimi kundër një skuadreje si Dukagjini mund të quhet si dështim. Ndeshja filloi me një entuziazëm të madh nga lojtarët e Lepencit duke u motivuar edhe nga 3.000 shikuesit e mbledhur në Stadiumin “Besnik Beginca". Pasqyra e ndeshjes reflektoi se me të vërtetë ajo që u mendua para ndeshjes do të ndodhte edhe në fushë, pra një fitore e lehtë e Lepencit. Lepenci shënoi menjëherë në minutën e 10-të, mirëpo goli u anulua me pretekst se kishte prekje të topit me dorë edhe pse kjo nuk u vërejt qartë. Mirëpo, vetëm pas dy minutash Pajtim Berisha shënon për të çuar peshë tifozët e Lepencit. Pas golit Lepenci vazhdoi pareshtur në kërkim të golit tjëtër që do të ishte edhe gol i sigurisë, mirëpo rastet e shumta asnjëherë nuk u konkretizuan. Me përjashtim të një rasti të mysafirëve, në pjesën e parë ishte vetëm Lepenci që shihej në fushë, por mëgjithatë rezultati ngeli vetëm 1:0.

Në pjesën e dytë lojtarët e Lepencit krijuan një komoditet të tepruar dhe të panevojshëm duke ecur nëpër fushë si turistë. Minuta 88, konfirmoi se kjo sjellje e lojtarëve të Lepencit ishte e gabuar. Mysafirët arritën ta barazojnë rezultatin dhe të nxjerrin një pikë shumë te nevojshme në Kaçanik. Ky gol i zbriti me këmbë në tokë lojtarët vendas të cilëve vonë ju dul gjumi për të arritur diçka më tepër. Duhet theksuar se, Fikshat ishin në nivel korrekt në anshmërine e tyre, ndërsa për organizimin mos të flasim, ata tani janë shembull në Kosovë.

..................

Lojtarët e Ulpianës grushtojnë gjyqtarin Arlind Krasniqi në Kaçanik

Gjithçka po shkonte në mënyrë perfekte, deri në minutën e 59-të kur mysafirët nga Lypjani grushtuan gjyqtarin kryesor të takimit Arlind Krasniqi pasi ky i fundit akorodoi 11 metërsh për Lepencin. Ekzekutimi i këtij 11 metërshi nuk u bë për shkak se ky gjest johuman i mysafirëve detyroi  ndërprerjen e ndeshjes. Kaçanikasit ishin përgatitur për këtë takim për të parë një ndeshje të bukur dhe për tu zbavitur, për të cilin takim grupi i tifozëve “Fikshat” kishin bërë një organizim të shkelqyeshëm. Nëpër rrugët e qytetit në Kaçanik, disa orë para ndeshjes shiheshin njerëz të të gjitha moshave të veshur me bluzat e kuqe dhe të zeza, ngjyra këto tradicionale të Lepencit dhe “Fikshave”. Ndërsa, në stadiumin “Besnik Begunca” ishin mbledhur rreth 5.000 shikues për të përkrahur lojtarët e Lepencit të cilët sivjet seriozisht e kanë marrë punën e hyrjes në Superligë. Numri i madh i shikuesve në çdo ndeshje e bënë Lepencin lider jo vetëm në Ligën e Parë por edhe në Superligë. Mirëpo, krejt këtë organizim dhe këtë bukuri pasditeje që organizoi Kaçaniku, e prishën mysafirët nga Lypjani të cilët nuk hezituan të grushtojnë gjyqtarin Arlind Krasniqi nga Prizreni para tërë këtyre shikuesve. “Arsyeja” e këtij reagimi turpërues nga futbollistët e Ulpianës ishte akordimi i 11 metërshit për ekipin e Lepencit, ku gjyqtari kishte të drejtë plotësisht sepse qartë u pa prekja me dorë nga mbrojtësi i skuadrës mysafire. Sikur mos t’ishte reagimi i policisë dukej se të gjithë lojtarët dhe banka e Ulpianës do të grushtonin gjyqtarin. Ky gjest prish bukurinë dhe rrjedhën e futbollit në Kosovë duke krijuar një imazh shumë negativ, sidomos tash kur jemi nën vëzhgim maksimal për të ndërkombëtarizuar sportin. Sa i përket ndeshjes deri në momentin fatal të ndeshjes, lojtarët e Lepencit për një nuancë ishin më të mirë se ata të Ulpianës duke marrë parasysh edhe përkrahjen madhështore të "Fikshave". Vlenë të përmendet edhe goditja e shtyllës në minutën e 35 nga Xhevdet Shabani, që tregonte se Lepenci me doemos do të luftonte në marrjen e pikëve të plota. Mirëpo, pikët e plota Lepenci do t’i merrë nga ky takim me rezultatin zyrtar 3:0.